సుప్రభాతమా ! - గవిడి శ్రీనివాస్ 08722784768 ,9966550601
సుప్రభాతమా సుమధుర దేశమా
సస్య శ్యామల శోభిత దృశ్యమా
చ1) మట్టి తల్లి గుండెల్లో వికసించే బిడ్డలూ
మమకారపు పేగుపైన అల్లుకునే బంధాలూ
పుడమి తల్లి గడ్డ పైన ఏ మనసుకదిపినా
రాలుతున్న శ్రమలో రగులుతున్న వ్యధలెన్నో
ఊగుతున్న జీవికలో ఉదయించని బతుకులెన్నో
కాగుతున్న గుండెల్లో జారుతున్న కన్నీటివాగులెన్నో
కానరాని చీకటిలో వొరుగుతున్న నిట్టూర్పులెన్నో ||సుప్రభాతమా||
చ2) కలిమి లేమి లన్ని నిన్ను చుట్టి ముట్టినా
చెరిగిపోని సంకల్పం చెలిమి చేస్తున్నది
చెదిరిపోని స్వప్నం ముందుకు నడిపిస్తున్నది
ప్రతి నవ భారత యువకునిలోనా
పులకించే పనితనం పయనించే ప్రగతి రధం
పరవళ్ళు తొక్కే తుంగభద్రా , గంగా , కావేరి నదుల సాక్షిగా
పునీతమైన గోదావరి ,నాగావళి, చంపావతి నదుల ప్రేరణ గా
బతుకులోన కొత్త ఆశలు చిగురిస్తున్నవి
పుణ్యభూమి లోన శ్రమా పరిశ్రమలు వికశిస్తున్నవి ||సుప్రభాతమా||
చ3) మాతృ గడ్డ మీద పుట్టి ఏ దేశమేగినా
కన్నతల్లి ఋణం తీర్చి వెన్నెల వెలుగులు పూయించాలి
కార్మికుడా కర్షకుడా కార్య సాధకుడా
కదం తొక్కి అడుగేస్తే
ఇక కదిలి పోదా అవని అంతా ||సుప్రభాతమా||
